إلى أستاذ عادل أريد مناقشة اقتراح مع حضرتك

بسم الله الرحمن الرحيم
السلام عليكم و رحمة الله و بركاته
فيه برنامج اسمه خواطر 5 جيه في رمضان كان بيتكلم عن اليابان و كده
مش هو ده المهم . المهم إن كان فيه حلقة بتتكلم عن النظافة في المدارس اليابانية و إزاي الطلبة و مع مساعدة الأساتذة كل يوم لمدة ربع ساعة أو حاجة زي كده بينظفوا المدرسة بنفسهم في جو هادئ و ظريف شوية و إزاي ده يطلع يغرس "التواضع" في الجيل اللي طالع و يعلمهم كمان شوية نظافة.
فإذا سمحت يا أستاذ عادل - و أي حد طبعاً لو عايز - ممكن أناقش الموضوع ده إيجابياته و سلبياته و إيه اللي يمنع من إنه يطبق في مدرسة الخديو إسماعيل؟
أنا فكرت في شوية أسباب ممكن تمنع تطبيق الموضوع ده في الخديو إسماعيل و في حلول لبعضها :
1 - عدم توافر أدوات نظافة كافية
ترفع البعض من أولياء الأمور عن السماح لأولادهم بالتنظيف و ده ممكن يكون لسببين . ممكن يكون بسبب إنه عن حساسية أو مرض يمنعه من كده و ده شئ يحترم جداً بل و أظن إن الطالب ممنوع عليه التنظيف إلا مهمات لا علاقة لها بالتراب و العفرة إطلاقاً زي مثلاً مناولة حاجة أو كده . و ممكن يكون السبب التاني إن ولي الأمر ممكن يكون هو إحنا باعتين ولادنا يتعلموا ولا ينظفوا و أظن بشوية مناقشة من حضرتك ممكن حضرتك تقنع ولي الأمر بالموضوع - ده لو حضرتك كنت موافق أصلاً على الموضوع - .
2 - استهتار بعض الأساتذة و تريقتهم على الموضوع
3 - استهتار بعض الطلاب بالموضوع و ممكن مع دخول المعظم في الموضوع يروح الطالب يندمج معاهم
4 - ترفع البعض القليل جداً جداً من الطلبة عن الموضوع
5 - عدم وجود وقت في وسط اليوم

أرجو إن حضرتك تقول لي مبدئياً جداً موافق على تطبيق الموضوع ده ولا لأ . و لو لأ فممكن حضرتك تناقشني ليه؟
و لو موافق أرجو إن حضرتك تناقشني إيه اللي يمنع من تطبيقه أو إزاي نطبقه
و رجاء إن تطبيقه مايبقاش بالإجبار في الأول عشان الطلبة مايكرههوش و يا ريت إن شاء الله حتى يتم أخد آراء الطلبة في الموضوع حتى عن طريق استفتاء مثلاً - استفتاء طلبة في الخديو إسماعيل ! إيه التخريف اللي أنا بقوله ده؟؟ ده ماحصلش تقريباً غير مرة واحدة السنة اللي فاتت -
و آسف على الغياب.
رجاء رجاء الرد

السلام عليكم و رحمة الله و بركاته.