قصيدة جديدة لـ : محـــمد بغــــدادى .. كرامة مصــــر وجعانى!!

مشرف

١/ ١٢/ ٢٠٠٩

<table dir=rtl cellSpacing=0 cellPadding=0 border=0><tr><td> قصيدة جديدة لـ : محـــمد بغــــدادى .. كرامة مصــــر وجعانى!! Photo

</IMG></TD></TR>
<tr><td></TD></TR></TABLE>

لا أنا «مارادونا».. ولا «بوشكش»..
ولا «ديستيفانو».. ولا «بيليه»..
ولا أمى «جانيت» هانم..
ولا ابويا سعادة البيه
أنا من شعبـِك الغلبان
ومدهوسة كرامتى بالجزمة
وقاعد بانتظر عطفِك
ومستنى بقالى سنين
يا قهرانى مسا وصباح
وفى الأفراح، تخاصمينى
وفى الشدة، تلاقى جسمى كله جراح
وفى الحلوة.. ماليش لازمة
وفى المرة.. أقول يا كفاح
■ ■ ■
لا يوم لعبت بالكورة
فى شارع حتى أو حارة
ولا شجّعت بحرارة
ولا وقعت فى غرامها يوم
وفى نهايات كاس العالم..
جيرانى يغصبونى أقعد..
ثوانى.. ويكبس علىَّ النوم
لكن المسألة زادت
وصبحت حرب بين شعبين
وكذب وحقد ومعارك
مانيش عارف جابوها منين
ومش قادر أفسر لهفة العالم على الكورة!!
تقولش فراغ!!
يكونش ضياع!!
وكله صداع.. بدون لازمة
طب إحنا ماعندناش مشروع
ولا خطة لقهر الجوع
ومن كتر الحزن والأزمات
ماعدش فى عنينا دموع
لذلك اتشعبطنا فى الكورة
وقلنا ننتصر مرة
بقى لنا زمان مافرحناش
لكن شعوب العالم الأول
بيركبها مِتين عفريت
لما تشجّع الكورة
لكن عمرى فى حياتى..
ما شفت اللى انتو كمان شفتوه
ما شفتش فى حياتى وحوش..
وآدينى شفت!!
ما شفتش جبال الحقد والخبلان
وآدينى شفت!!
ولا شفت شماتة الأعداء..
وآدينى شفت.. شماتة الإخوة والخلان
من المحيط الأطلسى
إلى الخليج الفارسى
أول مرة أشوفهم كلهم سعداء
وأشوف فرحة فى عين الكل
لمّا شافوا جرحى نازف ذل
وأول مرة..
أشوفك يا مصر مكروهة لهذا الحد!!
كراهية بدون معنى
بدون أسباب..
بدون ما ترد بابك يوم
ولا تمنع دخول أحباب
■ ■ ■
عجيبة يا دنيا بالنسبة لواحد عجوز زيِّى
زمان، كنت أنا المارد..
وكانوا كلهم أقزام
زمان، يقوم المارد العربى..
تلاقى الباقى كله نام
زمان، كان صوتنا أعلى من التانيين
وكانوا كلهم عارفين..
بإن دراعك يا «عبدالناصر»
تقدر تطول أتخن شنب فيهم
ولو نايم فى حضن مراته فى سريره
ما هم عارفين قيمة مصر.. وعارفينه
يقدر يقول للكبير اخرس
ويقدر يضحّى علشان الشعوب تتحرر وتدعيله
وكانت كل الشعوب بتحبنا
وتكرهنا حكوماتهم
يحبك شعب عربى أصيل..
ويكرهك حاكم
مادام على شعبه مش حاكم
لأن المصرى كان بيجسّد أمانيهم
وبايع عمره وشاريهم
تموت فى الحرب علشانهم
وتشحت علشان بتحميهم
ويسقونا كاسات الذل، طبعاً فى أراضيهم
وهُمَّ يشربوا دمك
فى براميل الدهب لسود
■ ■ ■
زمان كنا قد القول
وعزة مصر فوق الكل
وكلمتها تهز الكون
وكرامتها تهم الكل
وناس بتخاف على زعلك.. وناس تسكت
وناس تراضيك.. عشان تسكت
وعالى الصوت.. يشوفك من سُـكاتْ يسكت
زمان ولى.. وعدى وراح
كفاية خلاص.. اتلهى واسكت
دلوقتى كلهم كارهين
حتى الشعوب وحكامهم بقوا كارهين
وعايرونا وقالوا علينا : فوّالة ومصريين
وقالوا علىَّ : فرعونى!!
وأهلى كلهم فراعين!!
ما أنا عارف.. وانتم كلكم عارفين!!
إن أنا من زمان فرعون..
وابن ستميت فرعون
■ ■ ■
خلاص.. بلا قومية عربية
ولا وحدة مصير عربى
ولا وحدة مصير بطيخ
أهانوا مصر وعَلَمها
ونزلوا فينا من غير ذنب
شتيمة، طوّروها لضرب
مش بس فى صحافتهم...
لأ.. وصحافة الغرب..
نزلت فينا كمان توبيخ
وهات يا صريخ
وفين يوجعك يا مصرى
وطاخ.. طيخ..
طاخ.. طيخ..
هنا.. وهناك..
يجيلك على أرضك
يدغدغ لك دماغ أهلك
ويخرم عين أبو أهلك
ويهرب من المطار قصاد عنين الكل
وإحنا نقوله: صباح الفل
ده برضه أخوك وضيف عربى
تروح له هناك
يهين كرامة أبو أهلك، ويتحداك
ويمسح بيك بلاط الأرض
ويبعت لك طوبة فى دماغك
وواحدة كمان فى نص قفاك
وإحنا الطيبين دايماً نقول: معلهش
انت الكبير ولازم تنسى وتسامح
عشان هو أخوك العربى..
وضرب الحبيب زى الزبيب..
بيوجع بس مايزعلش
■ ■ ■
تعبنا خلاص..
ولا عاد معنى للإخلاص
لفكرة عبيطة..
مرمية على الحيطة..
بقالها سنين..
شعارات وملزوقة على الجدران
بلا معنى فى كل مكان!!
ولو عايز تعرف الأسباب
تعالى هنا جنب.. ومن فضلك ترد الباب
وأتكلم، وتسمعنى كما الأحباب
لا أنا حكومى.. ولا معارض
أنا شارب كاسات الذل طول عمرى
حأقول لك كلمة محبوسة بقالها سنين
صحيح إحنا طيبين خالص
لكن كرامة مصر والمصرى
تبدأ من هنا من مصر..
يا مصريين
ولو هانت عليك نفسك
ضرورى فى كل مكان..أكيد تتهان
كرامة مصر مش لعبة
ولا كلمة.. ولا شعارات
كرامة مصر فى عزة شعبها يا شباب
وكرامتهم ولاد وبنات
كرامة مصر تبدأ من هنا
من مصر..
من بنت ماشية فى الشارع..
وحاسة إنها فى أمان
كرامة مصر فى الأقسام
وفى وحدة مرور زحمة
فى تخشيبة حجز بدون قضبان
فى البلطجة الدايسة على المساكين
ومش خايفة من الحاكم ولا السجّان
كرامة مصر..
فى وظيفة..
وكلمة شريفة
وهدمة نضيفة
ولقمة حلال
كرامة مصر
شغلانة للعاطلين
وسجن كبير للفاسدين
وضحكة جميلة للمساكين
ونزاهة فى الانتخابات
ولو تقدر أنا ويّـاك
وإن كنت باشك تملّى فى نواياك
لذلك ما تزعلش
إذا ضربوك هنا وهناك
محمد بغدادى
٢٣ نوفمبر ٢٠٠٩

~ مبتدء ~

ارجو التنسيق

مدير إدارة المدرسة

والله يا اخى وجعانى ... وجعانى ...وجعانى.
كرامة مصر... وجعانى .. وجعانى.......
نعمل ايه والدوا عارفينه ومش نافع نداويها بيه
مش عاوزه دوا ولا عاوزه اطبا وعارفينها عاوزه ايه
لكنه زمن ..بايخ..ماسخ..باللى عايشين فيه
ساكتين على الجرح..ويقولوا من الاخ ..لكن طلع الجرح جوانى
لانافع فيه سكات ولا دوا ولكن ..كلنا عارفين اللى نداويها بيه
تخاريف...تخاريف
علاج كل وجع ... التخاريف

» نكت جديدة خاصة جدا من اسراء غريب.....
» معجزة قرانية جديدة فى (و اشتعل الراس شيبا)
» حصريا برنامج YoutubeGet v4.9.11 للتنزيل الفيديوهات بسرعة و سهولة من Youtube - نسخة جديدة + السيريال